Choutar nas pozas

Vía Décalage

Fóra

vai frío

e venta

e chove

e faise noite axiña.

E a maioría dos días

prefiro quedar dentro,

baixo unha manta,

baixo unha lámpada,

baixo un libro.

Pero hoxe,

hoxe e todos os días que non son a maioría,

quero saír fóra

e choutar nas pozas.

Quero choutar nas pozas

e poñerme pingando,

poñerme coma un pito,

enchouparme toda,

tesa de vento,

azul de choiva, 

feliz
coma unha nena

con botas de auga

choutando nas pozas

mesmo se vai frío
e venta
e chove
e xa é noite.