E ti que? Planificas ou improvisas?

A xente é moi dada ás etiquetas. Semella que hai que definirse e ten que ser cunha etiqueta unilateral e inamovible. E, sen embargo, a mestura e a capacidade de cambio é o que nos fai seres únicos, non si?

Din que un artista ten que ser desordeado para ser creativo, pero, e se a ese artista lle gusta planificar o que vai facer? Entón, seguramente, lle digan que é un planificador.

Faleivos o outro día dos conceptos de planificadores e improvisadores. Se non o listes ide, veña, que non é moi longo. Xa?

Mesmo se parece que falamos de etiquetas (tipoloxías, adxectivos, como queirades chamarlles) que semellan excluíntes, non o son. Podemos ter unha mestura de habilidades e competencias, pero de certo sentirémonos máis identificados (e cómodos/as co noso traballo!) se descubrimos en cal das categorías encaixamos mellor.

ES UNHA PERSOA PLANIFICADORA?

Necesitas (case máis, queres) facer un plan para traballar? Detallas a estrutura do que queres escribir antes de poñerte? Na túa cabeza hai un comezo, unha acción e un desenlace claro antes de sentar teclear? Non te escondas, es unha persoa planificadora.

Ás persoas planificadoras encántanlles os libros sobre como escribir, gústalles coñecer a súa historia moi a fondo mesmo antes de escribir o primeiro borrador e tenden a utilizar cantidade de métodos para describir argumento, localizacións, personaxes... e telo todo fiado antes de traballar.

Se te paras a perfilar todos estes detalles antes de escribir, tes unha clara tendencia planificadora.

Isto non significa que non poidas (nin debas) deixar algo de espazo para a improvisación, pero coñecer a túa tendencia axudarache a saber que ferramentas de planificación che poden ser útiles (xa falaremos delas!).

Coidado con: pasar máis tempo pensando que escribindo e con encher a casa con tratados sobre escritura que, sábelo ben, é moi probable que nunca leas.
Aproveita que: as túas historias están despedazadas en notas e esquemas, serache moi útil para resumir o teu traballo, volver a detalles pasados sen ter que ler todo o libro ou para saber onde engadir algo novo sen te perder.

ES UNHA PERSOA IMPROVISADORA?

Facer esquemas do que vai pasar na túa historia paréceche perder o tempo? Cres que definir de antemán os elementos e protagonistas do libro lle quita emoción? Na túa cabeza non hai máis que ansia por escribir e ver que raio sae da aí? Se asintes, es unha persoa improvisadora.

Ás improvisadoras gústalles sentar sen folla de ruta, especialmente, para soprenderse co resultado do que fan. É posible que mesmo non saiban como se van chamar as personaxes do libro mesmo despois de acabar o primeiro borrador. As súas historias poden comezar sendo unha cousa e acabar sendo outra moi distinta, mesmo cambiando de xénero.

Se non queres nin oír falar de fichas de personaxes e esquemas de argumento, o teu traballo é claramente o dunha persoa improvisadora.

Claro que tamén podes tomar un par de notas para evitar o bloqueo: iso non te convirte nunha maniática planificadora!

Coidado con: as incoherencias do texto (hai que revisar, mesmo se non che gusta) e cos bloqueos de ideas, que poden ser máis habituais que para quen planifica.
Aproveita que: ir descubrindo a historia segundo avanzas pode non só sorprenderte a ti, senón aos teus lectores;  ademais, nada che impide explorar técnicas non compartimentalizadas ou cambiar o final catro veces!


Lembra, coñecerte a ti mesma/o só pode axudarche a empregar mellor o teu tempo e os teus esforzos, pero non te resignes a unha etiqueta: experimenta e sae da túa zona de confort.

• Se es máis de improvisar e probas a planificar, podes evitar bloquearte. Proba a facelo cando te atasques!
• Se prefires telo todo atado, proba unha situación inesperada e improvisa: podes atopar vías e historias nas que non pensaras!

Proba! E escribe, claro.